“ಹುಟ್ಟು ಉಚಿತ, ಸಾವು ಖಚಿತ” ಅನ್ನುವುದು ಜಗದ ನಿಯಮ. ಆದರೆ ಕೆಲವರ ಸಾವುಗಳು ಮಾತ್ರ ನಮ್ಮ ಕಣ್ಣಾಲಿಗಳನ್ನು ತೇವಗೊಳಿಸಿ, ಮನಸ್ಸಿನಲ್ಲಿ ಕಳವಳ ಮೂಡಿಸುತ್ತವೆ. ಅಂತಹದ್ದೇ ಒಂದು ಕರುಳು ಹಿಂಡುವ ಘಟನೆ ರಾಜಧಾನಿ ಬೆಂಗಳೂರಿನಲ್ಲಿ ನಡೆದಿದೆ.
ಇಬ್ಬರು ಹೆಣ್ಣುಮಕ್ಕಳು, ಮೊಮ್ಮಕ್ಕಳು ಹಾಗೂ ನೆಮ್ಮದಿಯ ಸಂಸಾರ ಹೊಂದಿದ್ದ ವೃದ್ಧ ದಂಪತಿ, ಈ ಇಳಿವಯಸ್ಸಿನಲ್ಲಿ ಯಾರಿಗೂ ಹೊರೆಯಾಗಬಾರದು ಎನ್ನುವ ಒಂದೇ ಕಾರಣಕ್ಕೆ ವಿಷ ಸೇವಿಸಿ ಪ್ರಾಣ ಕಳೆದುಕೊಂಡಿದ್ದಾರೆ!
ಏನಿದು ದುರಂತ ಪಯಣ?
ಬಸವೇಶ್ವರನಗರದ ಶಿವನಗರದಲ್ಲಿ ಲೀಸ್ ಮನೆಯಲ್ಲಿ ವಾಸವಾಗಿದ್ದ ಈಶ್ವರ್ ಆಚಾರಿ (73) ಹಾಗೂ ಗೌರಿ (66) ದಾಂಪತ್ಯದ ಅಂತಿಮ ಅಧ್ಯಾಯವಿದು. ಪ್ರೀತಿಯಿಂದ ಸಾಕಿದ್ದ ಹೆಣ್ಣುಮಕ್ಕಳು: ಇಬ್ಬರು ಹೆಣ್ಣುಮಕ್ಕಳನ್ನು ಕಣ್ಣಲ್ಲಿ ಕಣ್ಣಿಟ್ಟು ಸಾಕಿ, ಮದುವೆ ಮಾಡಿ ಕಳಿಸಿದ್ದರು. ‘ನನಗೆ ನೀನು, ನಿನಗೆ ನಾನು’ ಎಂದು ಬದುಕುತ್ತಿದ್ದ ಈ ಜೋಡಿಗೆ ಇತ್ತೀಚೆಗೆ ಕಾಲವೇ ವೈರಿಯಾಯ್ತು. ಆರೋಗ್ಯ ಕ್ಷೀಣಿಸಿತು: ಗೌರಿಯವರಿಗೆ ಬಿಪಿ, ಶುಗರ್ ಹೆಚ್ಚಾಗಿ, ಸೊಂಟದ ಸ್ವಾಧೀನ ಕಳೆದುಕೊಂಡು ಸಂಪೂರ್ಣ ಬೆಡ್ರೆಸ್ಟ್ನಲ್ಲಿದ್ದರು. ಪತಿಯೇ ಎಲ್ಲ ಆರೈಕೆ ಮಾಡುತ್ತಿದ್ದರು. ಆದರೆ, ಈಶ್ವರ್ ಅವರಿಗೂ ವಯೋಸಹಜ ಕಾಯಿಲೆಗಳು ಕಾಡಲು ಶುರುವಾದವು.
ಮಕ್ಕಳ ಒದ್ದಾಟ ನೋಡಲಾಗಲಿಲ್ಲ: ಹೆಣ್ಣುಮಕ್ಕಳು ಹೆತ್ತವರ ಜವಾಬ್ದಾರಿ ಹೊತ್ತು, ಆಸ್ಪತ್ರೆ ಖರ್ಚು-ಔಷಧಿ ವೆಚ್ಚ ಎಲ್ಲವನ್ನೂ ನೋಡಿಕೊಳ್ಳುತ್ತಿದ್ದರು. ಆದರೆ, ತಮ್ಮಿಂದಾಗಿ ಮಕ್ಕಳು ಕಷ್ಟಪಡುತ್ತಿದ್ದಾರೆ, ನಾವು ಯಾರ ಮೇಲೂ ಭಾರವಾಗಬಾರದು ಎನ್ನುವ ನೋವು ತಂದೆ-ತಾಯಿಯನ್ನು ತೀವ್ರವಾಗಿ ಕಾಡಲಾರಂಭಿಸಿತು. ಕಳೆದ ರಾತ್ರಿ ಜ್ಯೂಸ್ನಲ್ಲಿ ವಿಷ ಬೆರೆಸಿ ಕುಡಿದ ಈ ವೃದ್ಧ ದಂಪತಿ ತಮ್ಮ ಜೀವನಯಾನವನ್ನು ಮುಗಿಸಿದ್ದಾರೆ. ಮಾರನೇ ದಿನ ಬೆಳಿಗ್ಗೆ ಮಗಳು ಎಷ್ಟೇ ಬಾರಿ ಫೋನ್ ಮಾಡಿದರೂ ಕರೆ ಸ್ವೀಕರಿಸದಿದ್ದಾಗ, ಗಾಬರಿಯಿಂದ ಮನೆಗೆ ಓಡಿಬಂದು ಬಾಗಿಲು ತೆರೆದು ನೋಡಿದಾಗ ಇಡೀ ಕುಟುಂಬವೇ ಆಘಾತಕ್ಕೊಳಗಾಗಿದೆ. ಮನೆಯ ಬಾಗಿಲ ಬಳಿಯೇ ಇಬ್ಬರೂ ಜೀವವಿಲ್ಲದೆ ಮಲಗಿದ್ದರು! ಮಕ್ಕಳಿಗೆ ಶ್ರಮವಾಗಬಾರದು ಎನ್ನುವ ಹೆತ್ತವರ ಪ್ರೀತಿ ಮತ್ತು ಕಳಕಳಿ ಅರ್ಥವಾಗುತ್ತದೆ. ಆದರೆ, ಮಕ್ಕಳ ಕೈಯಲ್ಲಿ ಬೆಳೆದು ದೊಡ್ಡವರಾದ ಮೇಲೆ, ಅವರಿಗೆ ಆಸರೆಯಾಗುವ ಅವಕಾಶವನ್ನು ಕೊಡದೆ ಹೀಗೆ ಧಕ್ಕೆ ತಂದುಕೊಳ್ಳುವುದು ಎಷ್ಟರ ಮಟ್ಟಿಗೆ ಸರಿ? ಪ್ರತಿಯೊಬ್ಬರಿಗೂ ಇಳಿವಯಸ್ಸಿನಲ್ಲಿ ಮಾನಸಿಕ ಹಾಗೂ ಭಾವನಾತ್ಮಕ ಬೆಂಬಲದ ಅಗತ್ಯವಿದೆ.
